當年今日
關於我們

【送餐又整電腦】李克勤容祖兒大馬開騷 遇全能酒店職員

蘋果日報 2016/11/06 18:04

李克勤容祖兒

容祖兒同李克勤噚晚完成兩場大馬雲頂巡唱,克勤冇諗過11月嘅雲頂好似英國咁凍,晚上跌至得幾度:「我一向怕凍,問酒店攞兩個暖風機先夠暖,開咗一晚之後,喉嚨有啲乾,又問酒店攞放濕機,點知酒店畀咗抽濕機,個一刻真係好暈吓,哈哈!」
同樣遇上搞笑事嘅祖兒話:「我帶去嘅電腦上網有問題,打電話畀酒店求助,酒店話會派電腦部專業人員嚟,嗰位小姐好細心查看我嘅電腦,然後講咗一堆我聽唔明白嘅英文,我只係聽到google呢個字;之後我去李生間房食晚餐,當晚餐送入嚟,我嚇咗嚇,因為送餐又係嗰位電腦部專業女士。」
第二日做完頭場騷,夜晚返酒店開會叫咖啡,祖兒話:「又喺嗰位電腦部女士送咖啡,然後我問大家,係咪我眼花,你哋間房係咪同一人送嚟?呢間酒店好似晚上八點後,得番佢一個人,十項全能咁,你叫乜都係佢搞,好好笑。」
此外,大馬嘅羽毛球王李宗偉都有捧克兒場睇騷,原來三人一早認識,之前李宗偉嚟香港仲相約食大閘蟹,本來今次大家都想約喺大馬打波,但後來李宗偉撞咗工作,所以嚟睇騷同去慶功,稍後李宗偉會嚟香港出席羽毛球公開賽,克勤話:「到時大家再約吃飯,睇下有冇時間打番場波囉。」