當年今日
關於我們

【短片】【才俊男友視像求婚】31歲岑麗香明年加國嫁人?

蘋果日報 2015/12/10 06:00

蘋果岑麗香即時Joshua

現年31歲嘅岑麗香(香香)今年10月被《蘋果》影到佢同男友Joshua喺車廂舌戰,仲一齊返將軍澳寓所,之後香香大方承認與金融才俊男友已拍拖半年(新聞連結: http://bit.ly/1JGetUZ )!

今日有周刊爆,香香今年3月透過朋友撮合,同Joshua一見鍾情,Joshua喺一間國際金融集團加拿大分部做職財務分析,上年做埋公司合夥人,所以二人基於工作關係,聚少離多分隔兩地,只可以靠視像電話傾偈,報道更指,男方最近喺視像向香香求婚,希望香香婚後相夫教子做少奶奶,盛傳香香答應,仲計劃出年喺加拿大結婚。

據報道指,一向鬼妹仔性格嘅香香,早前忽然想戀情低調啲,香香聲稱係媽咪會鬧,又話男友唔係圈中人,周刊就爆係大台唔想佢咁高調晒愛,又話知情者講香香自爆出戀情,次次出騷都講男友,大台經理人都搵過香香「照肺」,香香同經理人仲嘈咗幾句,仲話香香因為唔聽話,冇得做女一。吓!真唔真呀!

周刊更稱,有次男友同香香視像通話,男方知香香受到公司壓力,男友就同香香講如果辛苦不如結婚,叫香香返加拿大生活,令香香好感動,兩個禮拜前,男友亦因公事嚟咗香港,逗留一個星期,走嗰陣,香香都有送男友去機場,香香攬住男友好唔捨得,而11月17號生日嘅香香,早前亦返咗溫哥華搵男友提早慶祝,男友為佢搞一個驚喜party!日前仲被周刊記者影到香香駕車、手揸軚盤時,照同男友玩FaceTime!

不過,周刊向香香求證時,問到香香會唔會閃婚,佢就話一步一步嚟,唔好諗咁遠。