正在趕拍大台新劇《反轉貴利王》嘅黎諾懿，今朝凌晨都仲為新劇開工，真係要喺工作中渡過生日，但慶幸佢有一班好好嘅同事，係踏入佢生日嘅一刻，送上驚喜，佢同慶祝38歲生日。

今日凌晨黎諾懿就係微博同ig上載短片，當時黃智雯一見到黎諾懿，就唱「happy birthday to you」，跟住仲做手勢，示意叫工作人員送上生日蛋糕，見到黎諾懿嘅表情都有啲愕然，然後佢就輕吻好拍檔黃智雯，以示多謝，睇到佢哋呢個工作團隊真係好有愛呀！

黎諾懿就留言話：「工作途中送上驚喜，多謝我的期間限定的女神黃小姐(黃智雯)送上今年第一個蛋糕，多謝所有工作人員，希望大家都幸福快樂#生日蛋糕#工作中度過 #期間限定#開心」，好多網民見到都留言祝佢生日快樂，仲大讚黃智雯好有心㖭！

除咗工作好拍檔有心思，身為老婆嘅李潔瑩都係凌晨時份，係ig貼咗同黎諾懿嘅四格sweet sweet自拍照，祝老公38歲生日快樂，佢留言：「Happy birthday my husband/soulmate/eldest son/best friend/lover, etc etc! Love you」。

其後壽星仔黎諾懿亦都喺ig貼咗同老婆一樣嘅四格相，留言話：「多謝妳陪我度過七個年頭的生日，多謝妳悉心照顅，待我可專心工作，老婆，我愛妳」，工作過後，黎諾懿終於可以返屋企，同老婆、囝囝「小春雞」同愛犬，一家四口切蛋糕慶祝，佢話：「多謝大家的祝福！」

精選娛聞，喺晒《娛果》
http://fb.com/appledailyent