當年今日
關於我們

地產多聲道:擎天花十萬添藝術氣息

蘋果日報 2003/09/08 00:00


政府上個禮拜五大鑼大鼓廣邀全世界,為西九龍文娛藝術區畀發展建議,九倉都算反應快,即刻將文藝區獨一無二嘅標誌──巨型天幕,加喺九龍站上蓋擎天半島模型度,畀睇樓客感受吓個盤幾近文藝區。而且啲代理也就住新鮮熱辣嘅賣點,不斷勁推介。
聽九倉黃光耀講,原來單單呢件天幕模型嘅製作費就要十萬蚊。其實九倉早已作好部署,幾個月前搵咗間製作公司設計。
為要逼真,間製作公司出盡法寶搵料,好似做天幕嘅物料,有幾多塊係透明、幾多塊唔透明,點樣排列,都跟足原設計嚟做。
由於文藝區最快都要2010年先有嘢睇,大家有興趣可以上去擎天個售樓處參觀吓,幻想吓呢個未來香港地標。

新地商場搵外援巡迴表演
商場大業主不時會請外國出名團體嚟表演,好似新地就請咗韓國樂天世界嘅舞蹈團「夢遊韓國」,表演傳統韓國舞蹈,包括大鼓舞、小鼓舞、三鼓舞同四物表演等。今個禮拜五喺大埔新達廣場同上水廣場有得睇;禮拜六就喺上水廣場同荃灣廣場表演;禮拜日除荃灣廣場,重會去埋屯門卓爾廣場。
另外,房委會搵咗廣西桂林旅遊局「春天劇場」,表演民族舞同變臉,重有民族服飾睇。秀茂坪商場禮拜五有得睇,翌日轉到將軍澳尚德商場,禮拜日就喺東涌富東商場表演,總之大把嘢睇。
鐵約舖投資者至愛
日前以九千五百萬賣出嘅屯門市廣場二期商舖,已經轉咗三次手,呢間舖重好富傳奇㖭,因為佢係商場唯一可買賣嘅舖位,唔通真係物以罕為貴?
據做成呢宗成交嘅經紀講,舖位第一次轉手係88年,香港賽馬會向發展商信和購入,作價二千五百萬。到95年,就用三千五百萬賣出,賺咗一千萬,物業七年漲價四成。八年後嘅今日,物業以九千五百萬再轉手,賣方帳面獲利六千萬,物業升值一倍七。租客由馬會、遊樂場,到𠵱家嘅滙豐銀行,全部都係單一租客;𠵱家滙豐以月租六十萬租用。呢啲由實力大租客租用,俗稱鐵約舖,最受投資者追捧。

自由行激發中港夫婦置業
內地人以自由行身份嚟港買樓嘅消息,近嚟熱火朝天,南豐嘅將軍澳廣場,最近都有一單,聽中原助理營業董事譚桂貞講,買家係一對夫婦,先生喺深水埗租樓住,太太係內地人,由於可以自由行方式經常嚟港,激發佢哋嘅置業念頭,最後買咗七座A單位,五百六十九方呎,成交價一百二十七萬幾。據聞佢哋只係借四成,其餘畀現金。
港置近水樓台
長實嘅尖沙嘴港景峯,部份商場𠵱家做咗港景峯、大角嘴凱帆軒同長沙灣宇晴軒嘅售樓處,示範單位都喺埋度,成為市民睇樓嘅集中地,香港置業就喺對面嘅百達行租咗個地舖,開「宇晴軒銷售中心」,部署兵力搵客。
銷售中心今日開幕,咁啱長實又喺港景峯開記者會,高級營業經理郭子威開完會會過去捧場,啲記者自然跟埋過去影番張相,應驗咗「近水樓台先得月」呢句話。
蘭西
電郵地址:[email protected]
empty
最近以九千五百萬轉手嘅屯門市廣場二期商舖,現由滙豐銀行以每月六十萬租用。