近排好紅嘅45條關注組除咗多大狀，重有就係多猛料學者，例如關信基、陳祖為同陳家洛；而喺班大狀之中，吳靄儀同梁家傑都算係半個學者，吳大狀係波士頓大學嘅哲學博士，當年都諗過返大學教書，佢要搵番個教席易過借火。梁大狀重勁，自從中學開始已經俾同學尊稱做梁教授，因為學識夠廣博，咁做得教授重唔係學者？如果他日選埋關信基做黨魁，咁大狀黨就唔止係君子黨，亦隨時可以轉做學者黨。
學者嘅特質係冷靜睿智，但係A45嘅成員啲感情都好豐富。好似余小姐咁，八方記得同佢做訪問，提到香港嘅民主時，Audrey都試過講講吓忍唔住眼濕濕。湯大狀就更加唔使講啦，好似關注組第一次開組黨記者會咁，佢淨係講咗一句就講唔落去。

關教授演講老淚縱橫

關信基又係一樣，上堂雄辯滔滔，其實為人就好感性，佢以前喺中大開會，講到中大要搞國際化呢個問題，都忍唔住老淚縱橫，試過有次去外國演講，佢亦感情豐富到喊出嚟。
關信基同八方講，今次參與組黨其中一個原因，就係希望做啲嘢，令香港好啲，因為佢好鍾意香港、好緊張香港，唔想香港衰。記得幾年前去美國演講，一講到香港從來冇自主，以前要睇英國佬面色，𠵱家就要睇中國眉頭，即刻悲從中來，忍唔住落淚。
呢樣真係「生為香港人嘅悲哀」，話說關太喺個演講會度睇住丈夫喊，之後就同關信基半講笑咁話：你咁鍾意香港，咁我一定陪你一齊留喺香港啦。有太太咁支持，教授當然唔怕挺身而出。關信基又話，今次組黨唔係要同共產黨搞對抗，唔係要奪共產黨權，只係因為搵到啲志同道合嘅人，希望推動公民社會發展，總之三月一定會有公布啦。
教埋今年書，關信基就可以喺中大退休，但中大已經同佢講，會請佢留喺中大做顧問，等佢可以繼續為大學貢獻，劉校長都幾大方啫。

傳真︰2623-9278
電郵︰[email protected]