當年今日

股海實戰錄:五窮六絕七翻身

蘋果日報 2002/06/10 00:00


美股上周調整明顯轉急,由另一個角度睇,則反映短期跌勢接近尾聲,除非再出現其他特大利淡消息。上周五杜指及納指早段大跌,其後收復大部份失地,反映低位有買盤承接,此外,技術上杜指及納指9RSI均出現背馳,亦反映隨時出現反彈。
恒指上周僅跌17點,走勢明顯較杜指及納指為佳,同時亦持續近期不太受美股走勢影響嘅趨勢。「五窮六絕七翻身」呢句話以往經常用嚟形容電影業嘅情況,但今次可能適用於港股。

將有櫥窗粉飾效應
有分析話美國勞工市場數據欠佳,聯儲局有機會推後至9月才加息。呢個對香港係好消息,對地產股及銀行股利好。此外印巴局勢有緩和迹象,如果冇變,淡友又少一個造淡藉口,另外6月基金半年結,7月董建華正式連任,始終都要做啲櫥窗粉飾嘅工作,希望趙飛雲冇估錯,港股7月可以有轉機。
藍籌股之中,始終都係長實(001)睇高一線,上周五逆市升0.75元,收72.75元,重返50日線(現處72.45元)上,短期如果能企穩,則反映調整有機會完成,可伺機追入長實Call輪。倉內嘅鞍鋼(347),仍按原定策略,若向上以大成交升破1.30元可以加注,跌破1.18元止蝕。
趙飛雲