雖然英格蘭「幼獅」喺今屆U21歐國盃來勢洶洶，但西班牙「小狂牛」話畀大家知，佢哋先係大熱門！周五U21歐國盃B組最後一輪賽事，賽前篤定出線嘅西班牙U21正選11人全部換晒，依然憑巴塞隆拿中場丹尼斯蘇亞雷斯一箭定江山，以1:0小勝塞爾維亞U21，小組3戰全勝強勢迎戰4強！

「小狂牛」賽前兩連勝鎖定首名資格，塞爾維亞就提早出局，所以呢場例行公事大把試陣空間，其中西班牙相比上場擊敗葡萄牙3:1一仗，正選11人全部唔同晒，包括辛度拉美利斯、沙奧尼古斯、馬高阿辛斯奧等悉數休息，由畢爾包嘅伊拿基威廉斯、皇家蘇斯達嘅奧耶沙巴爾同皇家馬德里嘅保查馬約奴組成前線三叉戟，依然憑38分鐘皇蘇右閘奧迪奧蘇拿右路地波傳中，丹尼斯蘇亞雷斯撞射破網，以1:0擊敗最終10人應戰嘅塞爾維亞。

同組另一場，葡萄牙U21雖然憑新加盟RB萊比錫嘅布魯馬梅開二度，4:2擊敗馬其頓U21，賽後3戰得6分排小組次名，但得失球不及A組次名斯洛伐克宣告出局，至於斯洛伐克能否以最佳次名出線4強，仍要睇埋今晚C組戰果。

西班牙vs塞爾維亞精華： http://bit.ly/2t59ccW
葡萄牙vs馬其頓精華： http://bit.ly/2tEbMV1