港股風雨飄搖，反彈一日後再插鑊甘，歐元早排失守1.30後，一直拾級而下，希臘銀行更傳擠提，大戶班資回潮說法甚囂塵上。股市作為最易套現嘅投資市場，當然首當其衝，戰友不得不防。
跌市下撈底考功夫，選股亦要審慎，太古地產（1972）資產質素佳，可優先考慮。太地去年基本溢利增1.7倍至129億元，主要受惠租金收入增長8.7%，至86億元。旗下物業件件正貨，包括太古廣場、太古坊、太古城中心等，叫租能力極強，商廈出租率超過95%，商場更全部爆晒。下半年相繼落成的商廈項目，可提供23萬方呎樓面，加上廣州太古滙及北京頤提港，租金收入有望再升；同時西半山豪宅蔚然及珒然陸續出售並入賬，將提供強勁收入，值得看高一線。太地昨收22元，跌1.4%，惟大市沽壓勁，不排除先試20日線21.20元，穩陣派可候50日線20元水平吸納，中線持有，回報一至兩成冇難度。
唐牛