漫長的馬季進入最後直路，今季尚餘七次賽事，不足100場賽事。從近幾次賽果所見，可發現唔少馬取得季內首勝交代，相反新勝馬不時演出走樣，相信在本季餘下的賽事，類似情況會持續出現，所以趁周中冇馬跑的空檔，提出來同大家分享。

今季仲未贏夠16場的幾位練馬師，戰意特別高昂，好似剛周六（16日）有馬贏的鄭俊偉和麥菲文，以及憑「亮先生」切切實實地贏夠第16場的賀賢。已收過馬會警告信兩次的李易達，目前馬房兵力薄弱，剩低七戰要贏多三場夠數上岸，機會實在不太樂觀呢！

另外，除了正在爭奪冠軍騎師的潘頓及莫雷拉外，華將如黃皓楠及蔡明紹，近期仍不斷向不同的練馬師尋求支持，而陣上亦頻頻贏馬，季尾值得多加留意。

此外，近幾次賽事有超過半數的頭馬，都是季內首勝，充份反映幕後向馬主交代的動機，如在港開齋的「飛雲騅」、「團結精神」和「歡樂之光」，而「歡樂人生」、「承你所願」、「總統至上」則是季內屢拚未贏的舊馬，終於能夠在馬季煞科前贏番場，而且贏馬都有好賠率。

不過，近期新勝馬成績卻慘不忍睹，近三次賽事共13匹新勝馬再跑，最終只有「醉多福」順利連捷，其餘12匹卻全部三甲不入，包括成為一面倒大熱門的「霸勝」及「白鷺飛翔」，硬仗付出體力，再出表現走樣，所以季尾新勝馬捧唔過。