勝敗乃兵家常事，行走江湖最緊要識得補中，幫自己保住江湖地位。澳洲猛將柏寶便作最佳示範，第五場唔騎「喜利高」而揀「快快贏」，結果前駒贏馬，有老馬燒鬚之嫌。幸好第六場三班千二米，柏寶馬上勝回一仗，夥拍徐廐七歲老馬「振興中華」爆出13倍冷WIN，幫好拍檔徐雨石包辦第五口孖寶，事關後者第五場已經贏咗楊明綸操刀之「喜利高」。
「振興中華」堪稱徐雨石代表作，由東廐來投後，今季已取三冠三位，呢場沿途咬住放頭馬「信眼光」，直路一見後駒力弱，即刻借勢後來居上，並且力拒「京城珍寶」來犯，影相險勝馬頭位，人馬贏得精彩，「京城珍寶」唔多好彩，後上不及輸少少做二奶，今季始終未能四捷。
「信眼光」閘前倒水咁倒，由十幾倍打到4.6倍開跑，鞍上人黃皓楠正係徐雨石徒弟，結果都係師傅叻啲，「信眼光」臨尾力歇跑第五；今場三、四名分別係「盈利駿馬」及「大將風雲」，三T冇人中正獎，中頭兩關收四萬銀安慰獎。
徐雨石說：「『振興中華』今季三捷超額完成，牠已經七歲，估不到可以有如此佳績，真是令我感到意外。」