由杜琪峯同游乃海監製嘅《樹大招風》入圍柏林電影節「新電影國際論壇」，同時又被選中成為第40屆香港國際電影節的開幕電影，部戲4月會喺香港上映，之前杜Sir更親自操刀影海報，認真大陣仗。

其實戲中3賊王任賢齊、陳小春同林家棟，自從電影煞科後已四散各地吸金搵食，杜Sir一聲令下，佢哋即刻放下手上嘅工作飛返香港埋位。

今次杜Sir親自上陣影海報，小齊好驚喜話：「杜生出聲，我哋本來各自喺唔同地方都趕晒返嚟，好似小春啱啱落機就趕過嚟，而且由杜生親自影喎，好難得，真係好驚喜！」小春就話：「我覺得好榮幸，無限驚喜。」不過，電影上映時卻選用了另一款海報，點解呢?杜Sir霸氣回應：「唔用咪唔用囉，使乜點解！」