棠哥噚日出席完勞動節酒會，聽到記者問起近日香港好多「便論」，棠哥就行返轉頭發表吓。佢話其實好多香港家庭嘅小朋友，都控制唔到幾時屙，「唔好將件事掹到高一高，又發表社論又盛」，認為小朋友已經喊晒，「又影住人，係好極端做法，冇乜必要」。社論？唔通講緊《環球時報》？
《新華社》就有篇文章，似乎同棠哥唱反調，文章引用美國一宗歷時三年嘅官司，引述法官話，係繁華商業街道隨地大小便係一種公害。篇文又話，「有些地方法律規定，隨地大小便的禁令，對無行為控制能力者和幼童網開一面，但監護人必須負責清理」。
講番個酒會，林鄭月娥噚日以署理行政長官身份出席致辭，長毛就打頭陣，高呼要全民退保，即時俾身邊十幾個保安押咗出門口。冇幾耐，職工盟又出馬，成十個人突然高舉標語恥笑狼英又放假，懶理工人權益。林鄭輕微不悅，但最後都有主動行去職工盟張枱接收請願信。