今日韓國仁川機場好熱鬧，唔少韓星都現身機場。

當中韓國男團JYJ成員朴有天下月來港開見面會，而聽日就係佢32歲牛一，朴有天日前就飛咗去日本舉行粉絲見面會，開完見面會後佢就未有留係日本放假，反而今日就已返回韓國，佢一身街坊裝現身機場，上身着上恤衫，下身就襯短牛仔褲。

雖然有唔少粉絲喺機場接機，但見佢全程就掛住篤手機同埋聽歌，而佢同南乳南陽乳業家族外孫女黃荷娜由宣佈婚訊到近日已分手，之前佢同黃荷娜打頭火熱時，手臂上被發現紋咗疑似黃荷娜個樣，如今佢哋分手收場，今日見佢手臂上仍然有疑似紋身，唔知朴有天係唔係仲掛住舊愛呢？

另外，河智苑同女團gu9udan成員金世正今日就出發為tvN新綜藝節目《伽利略：甦醒的宇宙》到美國進行外景拍攝，兩人會喺當地一齊研究火星，令唔少粉絲都話好期待。

更多韓流，喺晒《娛果》
http://fb.com/appledailyent