當年今日
關於我們

星級化妝師 為創業獨闖亞馬遜
RickChin:機會只得一次

蘋果日報 2010/11/21 00:00


RickChin──本港化妝界殿堂級人馬,已故巨星張國榮、天王張學友、影帝梁朝偉、影后張栢芝的一張臉,絕對放心交給他。穿梭於演藝界的他,突然有一天,跑到原始熱帶雨林亞馬遜住了整整一個月,找尋最天然的護膚材料。他不是為了保住外表,而是為了創業保住飯碗。 記者:陳皓怡
「住一晚草屋1蚊美金,一個tourguide每日10蚊美金。我請咗個tourguide一個星期,安頓後,我就自己同當地人喺森林生活。」說得輕鬆,但回憶第一天到達亞馬遜,「第一晚我唔敢瞓覺,不停覺得自己個身有嘢爬過,要搵電筒照,又唔敢亂郁。」RickChin說。
那為何要去?因為要創業,建立個人品牌。07年RickChin因脊椎移位被迫退下來,創業是出路。「你要知品牌只係行一次,再出嚟咩,冇人睬你o架喇。無論做邊行工作,你嘅chance只係得一次。」眼見不少名人建立自己的品牌,但很快便gameover,他不要重蹈覆轍。於是尋找別人失敗的原因,「佢哋只係搵OEM產品,掛自己個名,我唔buy呢樣嘢。」名氣成為唯一賣點,產品缺乏靈魂,最終註定失敗,他寧選擇一條較困難的路,由原材料、生產、銷售都親力親為。
「一定有方法解決」
體驗過天然精華油(EssentialOil)的好處,在大學教授提議下,RickChin揹着背囊,帶了兩件衫和兩件褲,走到最原始的地方,找最天然的材料。亞馬遜雨林早晚溫差超過攝氏40度,本應對肌膚傷害極大,但他發現當地人皮膚光亮緊致。從原住民身上學到惡劣天氣下,用生果及草本植物保護皮膚,並將配方帶回港。
在化妝舞台上贏盡掌聲,但在商業社會RickChin沒有得到優待,老遠跑到法國普羅旺斯買薰衣草,被拒門外,原因是對方只賣給大品牌。他並未放棄,問對方還有哪裏可買到薰衣草,對方告訴他,只要不是為了「普羅旺斯出產」的蓋印,克羅地亞亦有。他二話不說飛了去,買到同樣質素但價錢更低的薰衣草,「呢個世界係一定有方法解決!」
「冇咪由頭嚟過囉」
在港他同樣遭冷待。產品推出初期,要到處找零售渠道,星級化妝師每天硬着頭皮拿着產品,逐間商場、百貨公司叩門。由於最初沒做宣傳,大眾對產品不認識,商場擔心他付不起租,又驚產品口碑差影響其他租戶,故大部份都只叫他留下產品等消息。
等待的心情並不好受,由於首次創業夥拍明輝國際(3828),為了向股東交代,公司財務總監難免給予壓力,「當時真係徬徨o架,等於以前做化妝,唔係sell自己好就有人嚟搵你,嗰個階段只有忍耐。」他曾考慮最壞情況,連超級市場也不放過去叩門,「最差時甚至有諗過,一切都冇。但冇咪由頭嚟過囉!」
經過3個月的徬徨,他終見曙光,個人護理產品連鎖店邀他合作,產品罕有地「免費」上架。最令他鼓舞是,數十元的產品可走進「上流社會」,除了置地廣場、IFC等邀請他開專門店,更獲英國HarveyNichols邀請到倫敦銷售產品。
話說回頭,身邊失敗的創業例子這麼多,可有想過自己會失敗?「冇。因為只許成功,不許失敗!」RickChin再次流露殿堂級化妝師的自信。
RickChin簡歷
日本原名:Reki
學歷:TokyoModeGakuenFashionUniversity〈修讀時裝及形象學位〉
1995年-2007年:到香港工作,擔任化妝師
2007年:因脊椎傷患淡出化妝師行業
2010年初:開設沐浴護膚專門店
empty
亞馬遜原住民教Rick以生果護膚。 相片由Rick提供
成功之道
「哥哥」曾教路 永遠自覺是阿二
由化妝師到經營自家品牌,RickChin都有好成績。他說,張國榮(哥哥)曾教導他,要成功,必須永遠自覺是「阿二」。「一旦當自己係NO.1,就冇路去。」
他又認為,要成功,絕不可錯過任何細節。「人哋信唔信你,決定在於你之前點樣累積。」娛樂圈跟紅頂白,但RickChin說:「呢個世界唔會知有乜事發生,千祈唔好睇低人,更唔好睇得自己太高。」他說,當年為張玉珊化妝時,對方仍是剛出唱片的o靚妹,今天碰面,大家已是坐低傾生意,「原來唔可以小覷一個小妹妹,聽日佢可以變鳳凰。」
empty
影后張栢芝放心將皮膚交由RickChin打理。 資料圖片
不作宣傳
化妝師不為產品「化妝」
化妝師天職就是講包裝、講宣傳,但RickChin堅持開業首半年不宣傳,不為產品「化妝」,除了相信「有麝自然香」,更大原因是計唔掂數。「假設宣傳費100萬,若大半年前開始做宣傳,當時只有旺角同銅鑼灣兩間專門店,即係每間平均承擔50萬宣傳成本,唔化算。家有170間分店嘅萬寧賣我嘅產品,仲有各大商場專門店,200個outlet每間平均只係承擔5000蚊左右,跌都跌咗去。」
一盤生意,最傷腦筋是產品定位、定價,以RickChin的知名度,大可提高定價。不過,他想法剛好相反,「我問自己,如果我係消費者,會捨得畀幾多錢冲個凉,我諗1日1蚊。要300蚊支沐浴露,我自己都唔會買。」他希望產品能大眾化,既可在黃大仙買到,亦可在置地廣場找到。
empty
因為RickChin有腰患,被迫要從化妝界退下來,卻又給他帶來動力創立自己品牌。
成長經歷
人唔可以冇saving
父母在RichChin小時已離異,他跟母親在日本生活。小時候屋企開壽司店,家中每個小朋友7、8歲便要在壽司店工作,賺到的人工就是用來買自己碗飯食,RickChin也不例外。
他也試過沒飯開的日子,「大學一年級,同屋企人嗌交,自己出嚟租咗個套房,試過整個星期,每日只得100円。100円你知唔知可以買乜食?就係好似雪芳蛋糕咁嘅一塊蛋糕。」
試過捱餓,明白儲錢的重要,首份工開始,他將第一個月糧三分一儲起,跟着第二、第三個月亦如是,第四個月就有一個月糧儲蓄。「人唔可以冇saving,冇saving好得人驚。」
轉戰商界,RickChin慨嘆現時的年輕人過份受保護,「有個啱啱大學畢業嘅女仔嚟見工,居然帶埋阿媽嚟。」
RickChin當年曾拜於名師李偉明門下。當時師傅要他每日將報紙貼滿牆,練習一筆過畫直線練腕力,RickChin自覺獲益良多。現在每有年輕人跟他說要拜師,他都要求拜師者一個月後交回一份功課。就是一叠練腕力的報紙,可惜這份簡單的功課,他暫未收到,反而收到粗口一句。
empty
Rick笑說在亞馬遜的1個月,連畏高也克服了。 相片由Rick提供