蘇保羅馬房在季尾發動攻勢，上周日田戰取得四冠一季，而今晚賽事亦佈下強陣，五匹戰馬都配上外籍大師傅，又再擺出搏殺格。其中第八場三班1650米的「連利之星」季內未嚐勝果，今仗重配最佳拍檔莫雷拉，求勝決心大，值得信賴。

「連利之星」在港五場頭馬都在谷草一哩同程取得，谷草性能超卓。季內曾在二班跑谷草1800米得第二，只輸頭位給之後贏三級賽的「超有利」，而跑贏應屆百萬挑戰賽盟主「包裝騎士」，跑谷草的能力足以在二班爭勝。

「連利之星」近仗跑田草及泥地，部署減分落班，但上仗跑田草1400米亦後上跑得接近，反映評分已減過龍。今仗降班即回師首本路程，更搵埋莫雷拉助陣，人馬合作九次獲四冠兩亞一季，上名率逾七成，排十檔亦力足言勝。