鄭融同台灣男子組合Lollipop F成員威廉早排幫奇妙電視拍劇做夫妻，今日佢哋又「夫妻檔」喺機場拍廣告。佢哋喺現場拍咗一段時間，未埋位時，各自有助手幫忙補妝整頭，對位時威廉會同鄭融傾陣偈，大家都好專業投入。

廣告入面鄭融坐喺一個角落，對住一個機械人，個機械人都好善解人意，不斷喺鄭融對面手舞足蹈，為鄭融解悶，而鄭融過咗陣仲跟住機械人跳舞，到導演嗌cut，鄭融仍然玩得不亦樂乎，仍然係咁手揈揈又搖擺身體。但拍呢幕前鄭融其實已經等咗一陣，原來機械人跳咗一輪舞「熱身」，搞到身體「興烚烚」，要自動低頭休息。

另外，威廉多咗喺香港工作，見佢啲廣東話都進步咗，聽見佢同工作人員傾偈，說話間都夾雜廣東話，溝通完全冇問題。