武漢肺炎在內地大爆發,政府拖至1月30日關閉高鐵香港西九龍站口岸後,有在附近佐敦專攻內地旅客的藥房及找換店,被逼「拉閘」暫停營業。
高鐵西九龍站在2018年9月通車,大批內地旅客湧港,與高鐵西九龍站相距一條行人天橋的佐敦一帶舊區,包括文匯街、文英街、文苑街、文蔚街及官涌街市所在的一段廣東道,當時湧現多間主打內地旅客生意的賓館、餐廳及藥房,更不時見到拖篋旅客出沒。其中對正高鐵站天橋的文匯街,就有一間藥房及兌換店進駐。
不過,武漢肺炎在香港社區蔓延,港府最終於1月底宣佈關閉高鐵西九龍站,隨即令不少依靠內地旅客「搵食」的商舖大失預算。《蘋果》記者上周到該處視察,因高鐵效應開業的藥房已拉閘暫停營業;兌換店更已結業。另專攻遊客生意、售賣點心的食肆,本月初亦在門口張貼告示,指受疫情影響,將暫停營業至另行通知。
根據差估署最新的重估差餉租值顯示,該間藥房下年度的租值維持不變,但比上年度有30%升幅明顯放緩。至於專攻內地旅客的連鎖店萬寧,其位於文蔚街的分店,下年度租值則跌兩成。
在廣東道的高鐵星餐廳主力賣港式燒味,擺明做高鐵旅客生意,不過自武肺襲港,政府關閉西九高鐵站後,內地客絕迹,餐廳負責人黎永佳坦言,「路面都冇晒人,高鐵站閂埋,遊客絕迹⋯⋯依家蝕到瀨尿、等死」。他稱,去年爆發逆權運動影響不算最大,武肺才是直接衝擊,「黑衣人都係局部性,啲人都會出來消費食嘢,但疫症係全面性,啲人返工都唔夠膽,就算返工,放工都嗱嗱聲返屋企。」
他稱,該店現時只營業至下午,「3點幾就熄晒燈,夜晚唔開」,又指政府雖然有抗疫基金,但幫助不大,「政府係有心,都多謝佢,但做生意十萬八萬幫唔到幾耐,啲客唔會即刻返來⋯⋯依家局面好嚴峻,(抗疫基金)治標唔治本都冇用,政府幫唔到幾多,最好係疫症快啲結束。」他坦言,曾考慮止蝕離場,「黑衣人嗰時,舉例做開一萬蚊生意就剩返6,000、7,000,加埋疫症得返2,000、3,000。」
另在文蔚街開業超過30年的好鄰居餅店,老闆陳先生稱,武肺疫情衝擊比反送中運動影響更大,「之前有人喺我(麵包店)門口堵路都冇事,但疫情影響嚴重啲,依家啲人唔出街⋯⋯最大影響係停課,冇咗班學生生意,佢哋都佔生意額兩、三成。」他又稱,幸好遇到良心業主,租約仍未到期,相信「仲捱到吓」。
記者 譚靜雯
-----------------------------
【武漢肺炎】專頁 全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》
讀果 上架