曹仁超出席記者會，發言時居然全部講普通話，娛樂性十分豐富，好過上YouTube睇佢接受中央電視台訪問。問佢點解唔講廣東話，佢話大勢所趨，要追上時代嘞，否則易受淘汰。佢來港寄居多年，家都要講吓：「我以上海人為榮！」只不過佢唔識講唔識聽鄉下話，未免遺憾一啲。上海逐漸回復一九三○年時代之氣派，瞧不起香港咯。那時候，上海十里洋場，當香港係鄉下地方而已；已故舞蹈名師張老兄那時在上海讀暨南大學，教授帶佢去百樂門舞廳，跑馬廳與逸園賽狗，一切活動先進過香港二三十年，上海那把香港放在眼內。相信到咗二○三○年代，上海將會完全恢復歷史地位，香港食塵可也。
曹Sir講完普通非常嘅普通話，又聽吓港交所候任行政總裁李小加發言，佢嘅普通話自然比較正宗，港交所職員與佢溝通，講英文還是講普通話呢？李小加就話希望一年後出席新城電台經濟峯會，能以廣東話發言，佢以曹Sir嘅普通話水平為基準，希望有曹Sir一半咁好喎！
曹Sir嘅一半，唔講好過，以免記者聽唔明，引用錯誤！李小加係聰明人，要學廣東話，一定學得識嘅，但佢來港多年，專做內地項目嘅生意，學廣東話對佢並無任何「生產力」，故此唔講唔學唔識，但貴為港交所行政總裁，講廣東話有少許「內部回報率」，相信佢好快就會學曉嘅嘞。

記者會司儀之一係一位年青女記者，來港攻讀浸大傳理系畢業，呢位來自上海嘅小姑娘講普通話仲標準過李小加，講廣東話亦冇乜利智口音，可造之材也。佢在港生活四年，已與一般香港女性無異，可見年青人之可塑性甚高，逼住要學地方語言嘅話，冇話學唔識嘅。香港年青人學習普通話，亦作如是觀，佢哋一定會講得比父母一代好，至於佢哋講英語會唔會叻過上一代，此乃另一回事，如果未來生活做事靠跑大陸做生意嘅話，英文程度自然低降，話唔定係英美人士學普通話嚟遷就中國市場，多過中國人講英語遷就外人。今時今日李光耀居然自認新加坡過去嘅語文政策有大錯，搞到新加坡人唔識華語，只識英文，就係咁嘅意思。