薛凱琪（Fiona）前晚往中環為時裝品牌Max&Co任嘉賓模特兒行騷，專程由台灣返港出席活動的她，表示在台灣一次過經歷颱風與地震，她說：「我咁大個女第一次遇上地震，有晚半夜同朋友傾緊電話，突然之間斷咗線，成屋嘅嘢跌晒落地，我驚到匿喺張被入面，心諗『唔係咁死喺台灣呀嘛』，跟住又諗執衫走，打返香港畀同事又冇人聽。」

Fiona續說：「到第二日我同啲香港同事講：『真係死咗都唔知乜嘢事。』啲同事仲笑我話打畀佢哋都冇用，係打都打畀台灣華納嘅同事啦，我𠵱家就將台灣公司嘅電話號碼貼喺屋企牆上面，啲台灣同事後來教我遇地震要匿喺雪櫃側邊，因為夠高可以擋吓。」問她夜半與誰傾電話？是否祖名？她笑說：「梗係唔係啦。」
採訪：羅慧敏　攝影：陳俊強