世紀陽光（509）嚟緊嘅下星期三（三月十八日），將會派二○一四年度嘅成績單，集團主打嘅鎂金屬同化肥兩瓣業務醒神，應該有得博盈喜。中線少少，再博集團拆出其中一瓣業務，有肥仔增值。
世紀陽光上年上半年盈利大增46%，達到1.27億元，上邊兩瓣業務分部溢利，分別增長四成同三成，係雙頭馬車格局。而半年度打後，世紀陽光公佈頭九個月嘅數據，肥料呢部份嘅毛利率，按年仲keep住有所提升。

炒盈喜+分拆

世紀陽光主攻針對性強、高毛利新型號，避過同傳統產品競爭，喺呢個point，係其他肥料行業在上年嗌晒救命之時，世紀陽光嘅致勝之道。再睇近磅行家中化化肥（297），股價由上年十月中見底，到家陣翻咗半番，場內有券商大孖沙認為，化肥瓣數見底。食住個勢，世紀陽光呢瓣已經唔使憂。
又之前已提過，世紀陽光新一瓣嘅鎂金屬，被市場譽為二十一世紀環保輕原料，適用性相當廣泛，集團又同忠旺（1333）合作，後邊嘅忠旺，正係拓展德國嘅汽車輪轂（車胎鈴）生產線，若果搞得掂，每年所需嘅鎂產量，係七萬噸。世紀陽光亦進行擴充，鎂年產量，會由2.5萬噸，大增到7.5萬噸，單做忠旺呢位大客，亦已經掂過碌蔗。
場內專業評估，世紀陽光今、明年度EPS 0.14元同0.2元，現價（0.75元）預測PE得五倍。喺家陣，祖國有搞鎂金屬股份，預測PE係講緊二十五到三十倍，又上邊嘅中化化肥今年預測二十倍PE。咪忘記，世紀陽光啱啱搞掂收購權智（601），拆一瓣出嚟，價值一反映，增值好肥仔。呢轉先博世紀陽光有盈喜，當追落後咁計，翻半番到一蚊樓上，PE都係得7.5倍，未有耐追到行家。

錢雋
細價股專家
本欄逢周二、三、五刊出