保釣號上楊匡去到釣魚台，立即上fb打卡「到此一遊」，網民反應係，楊匡可以用到facebook，足以證明釣魚台已非中國領土。表面搞笑，但聽落有道理。釣魚台變成了一面照妖鏡，照出了各地政府政客面孔。保釣所引發民族主義之火，一旦處理不當，北京隨時會引火焚身。日韓兩國處理領土糾紛，大家都要跟住民情民意，但中國情況特殊，由於政治不開放，群眾借民族主義政治正確旗幟，上街抗議日本，但矛頭一轉，就會指返轉頭，指向自己政府。

民族主義陷困　進退不得

五四運動爆發也是同一軌迹，學生青年因第一次世界大戰後北洋政府外交失利，無法從戰敗國身上攞返被佔領土，上街抗議，外爭國權，下一步就係內除國賊，矛頭直指北洋政府賣國。日本佔領釣魚台已經係客觀事實，中國40年來對此只係得把口，早期北京為爭取中日建交，更不聞不問，國民黨政權同樣窩囊。
日本政客似看穿了北京投鼠忌器，既不敢去盡放手一博，派軍艦進入水域，因為日美軍事聯盟，有美國大佬撐腰，北京唔會因為釣魚台而全面反枱。但如果中央齋噏冇行動，民族主義之火就由外爭國權，變為內除國賊。
今日共產黨統治中國的合法性，只剩下一招，就係民族主義；不論太空人上太空，運動員攞金牌，一概係民族主義宣傳，但一遇上釣魚台問題，因北京歷史上已錯過了時機，民族主義陷入了困境，左右進退不得。
香港年輕一代對釣魚台冇反應，網民也有嘲笑保釣一班戇直中年，但阿古、阿牛今次搶過民族主義大旗，身體力行，踢爆了內地官方那套民族主義只係一種維穩工具，在國民教育及交流洗腦陰影籠罩下，畀巿民睇清楚，總算係有正面作用。
添馬男