一般學校畢業禮多數喺學校禮堂頒證書，中學生識得使錢，𠵱家興去酒店擺謝師宴，香港國際學校嘅學生家底有番咁上下，畢業晚宴前晚喺金鐘港麗酒店舉行，出席嘅家長堪稱星光熠熠，似名人去Ball多過畢業禮。
財爺唐英年兒子嘉盛、家燕姐孻女石耀珠，同埋霍英東孫女霍詠詩等都係應屆畢業生。財爺兩公婆一齊到場，嘉盛好怕羞，唔多願同記者講嘢，財爺幫個仔解圍，「囝囝畢業後會去美國讀大學，之前我同太太已經去咗美國一趟視察學校環境。」讀邊間大學就冇透露，會唔會入讀佢間母校密西根大學呢？
庫房今年水浸，財爺成日俾人笑數口差計錯數，佢個仔幾有數學天份，做老竇都大讚，「佢計數真係唔錯，希望佢讀書勤力啲、乖啲。」