電影《皇家特工：金圈子》（Kingsman: The Golden Circle）現正於韓國首爾舉行紅地氈活動，出席一眾巨星主角哥連費夫 (Colin Firth)、泰隆艾格頓 (Taron Egerton)及馬克斯特朗 (Mark Strong)都有出席同粉絲會面。現場氣氛相當熱烈，粉絲們都非常熱情，幾位男星仲同一眾粉絲親民合照與簽名，簽足45分鐘，令在場2500個粉絲相當興奮，不過上台發言僅僅2分鐘就離開。

一眾電影主角現身Lotte world tower商場，活動未開始已有數百個粉絲等候，站於前排嘅粉絲更表示佢哋早上10時已經開始等候。現場所見，一眾男星坐房車到達現場，首先見到馬克型仔落車，之後哥連費夫出場，同粉絲握手好親民，最後泰隆艾格頓仲壓軸出場。

三人上台與一眾粉絲打招呼，泰隆表示嚟到首爾非常興奮，好多謝大家到場支持佢哋，不過上台發言僅僅2分鐘就離開咗。其實出席活動之前，3位主角已先接受「Vapp」訪問，更大談去到韓國感受。哥連費夫就透露其實自己前日已到埗，覺得韓國非常靚又充滿戲劇性，自己好似同呢度有特別嘅緣份，而三人都覺得韓國粉絲非常熱情，於機場見到大家嘅反應更以為自己係披頭四（The Beatles）！講到最新一集，大家都非常興奮，哥連費夫：「《皇家特工》內嘅角色經常都展示出驚人嘅元素。」泰隆就指：「第二集變得更大膽。」而馬克更希望大家都期待呢部新作。但泰隆都有講自己拍動作場面時被打到個鼻，更痛到流淚，不過其餘動作戲就唔算太高難度。最後哥連費夫再次大讚電影風格夠時尚：「《皇家特工》嘅風格係時尚經典，係作為皇家特工嘅驕傲。」