上星期，香港繼續動盪，唔少人講過唔少嘢。但我最like一句說話，唔係出自黃之鋒，亦唔係鄺神把口；而係倪匡先生以前講過嘅：「人類之所以有進步，主要原因，在於下一代不聽上一代的話」。我覺得好有智慧，好應棍，簡直當頭棒喝。

唔淨止香港，就連科技公司，以前Apple、Amazon，都係巔覆傳統行業，以至今天香港Gogovan、Lalamove，亦係行呢條路、食呢條水。香港創投界有冇世代之爭、兩代人嘅矛盾？一定有，而且案例都唔少。

早兩日，同幾位創投圈朋友吹水。創投朋友A精警地講咗句「廢老投資者」。咩嚟？可以話係本地創投圈一種現象，而佢哋行徑，可以分成至少兩個唔同層次。

規模較細嘅廢老投資者，參投嘅方式，好有可能係作為朋友，又或者親戚長輩之類，聽到有個後輩嘗試搞新嘢，創辦間公司但缺錢，兩方面於是一拍即合。金額唔一定大，多至幾十萬，少則幾皮嘢。由於缺乏經驗，呢類項目，有時銀行戶口都冇，convertible note就更加唔駛講，多數就咁買股份。

問題係，部分廢老投資者，未必做過生意，耐性又唔夠，公司成立可能半年，就已經忍唔住問嗰後生仔：「近排搞成點？」

半年貨仔，其實又可以有咩成績？後生就梗係話：「搞緊㗎喇、搞緊㗎喇……」再過多半年，或者一兩年，廢老卒之耐性見底，忽然跳掣同後生講：「算喇算喇，我都係想攞返啲錢。」

對廢老而言，投資嘅錢，入股嘅錢，依然仲喺屬於佢地。若然賭波都可以咁，即係睇完上半場，覺得唔係好對路，直接打俾馬會：「算喇我都係攞返啲錢。」世界你話幾咁美好呢？

慘就慘在，創辦人到呢一刻至明白，為咗幾萬銀，代價原來咁昂貴。當初點解要求人、唔自己死慳死抵？後悔到不行。

當然我地不能單憑「年紀」，去衡量投資者識唔識嘢。例如最近我個每周簡報，入面個Startups懶人包，列咗參與過大大小小嘅本地項目嘅投資者。以維港投資為例，最大粒話事嗰個年紀都唔係細。但倒轉嚟講，就算叫得做VC，唔代表佢一定夠獨立同穩陣。

至於另一個層次嘅廢老投資者又係點，由於篇幅所限，我下回再同大家分享。

尹思哲
http://linkedin.com/in/wanszezit

investMAN
For People of Style & Substance
掌握理財智慧 感受生活品味
http://facebook.com/investMAN.hk