金鐘太古廣場(PP)向來多名人闊太shopping，華華今日因為工作行經愛馬仕（Hermès），發現有兩名型仔保鏢哥哥喺愛馬仕門外，肯肯定係等緊老闆濕平喇。佢哋老闆竟然係「超人」李嘉誠嘅紅顏知己周凱旋。

呢日食完晏，下晝兩點左右，周凱旋自己一個人喺愛馬仕行來行去，好隨意咁睇，唔似好有目的，同時間都有唔少阿太喺度周圍睇，周凱旋都無乜避忌，同店員有傾有講，冇耍大牌，最後買咗一袋戰利品離開。

眾所周知，愛馬仕係華置(127)創辦人劉鑾雄(大劉)嘅愛牌，華華上前去問周凱旋是咪粉絲，周凱旋即刻耍手擰頭，話只係幫人買禮物，隨即打開個袋show畀華華睇，指份份禮物都貼晒label，記低顏色，以證明係送禮之用。佢仲企定定一下，做手勢掃一掃自己全身，意指佢一身都冇乜行頭，證明堅唔係自用嘅。

其實大家都知周凱旋向來低調，不時以修身黑、灰套裝示人，一頭短捲髮配貝殼形耳環就係佢嘅標誌。喺黑衣人眾多嘅PP，真係撞到都未必認得，都話佢係漆黑中的螢火蟲㗎喇。

最後，周凱旋跟華華講拜拜，就會合門口兩名外籍保鏢哥哥走人了。

蘋果財經，關心你飯碗
http://fb.com/appledailyatm