周二舉行嘅NBA常規賽，火箭以97:107輸畀帝王，戰績錄得12勝14負；球隊今季戰績唔好，中鋒懷特侯活（Dwight Howard）梗係唔高興啦，有傳佢仲不滿陣中主力夏登（James Harden），不斷扭計話要離隊。
火箭今季表現極差，據美國傳媒報道，侯活勁唔滿意球隊表現、又不滿自己嘅地位不及隊友夏登，所以扭計話要離隊。咁又係嘅，侯活自新秀賽季後，每季場均起手都有至少10次，但今季就急降到得8.3次；反觀夏登就多佢一倍，場均起手成20.2次。何況侯活𠵱家都30歲，肯定想轉去一隊有機會畀佢表現嘅球隊，趁機簽番份巨額長約，喺職業生涯嘅晚年賺返筆啦。不過，火箭應該唔會咁容易放侯活走，有傳球隊對熱火嘅「白邊哥」韋西迪（Hassan Whiteside）有興趣，係唔知熱火肯唔肯用白邊哥換侯活返嚟啫。當有記者問侯活係咪想離隊，佢就梗係否認啦：「我𠵱家只係想火箭贏。球隊已經兩連敗，令全隊都有啲沮喪，因為我知球隊嘅表現可以更好。」

鬧球證「基佬」　朗度再耍冧

]帝王雖然贏波，但主力控衞朗度（Rajon Rondo）因為周一爆粗鬧球證堅尼地（Bill Kennedy）係「死基佬」，今場被罰禁賽；佢事後都知衰，周二再發表公開聲明道歉：「我真係由衷向堅尼地道歉，好後悔講咗啲咁難聽嘅說話鬧佢。無論喺場內場外，我哋都應該尊重人哋嘅性取向。」