奧斯卡影帝，42歲嘅里安納度狄卡比奧（Leonardo DiCaprio）一直都係浪子一名，除咗之前驚傳同琦溫斯莉（Kate Winslet）拍拖令人虛驚一場之外，其餘女友一概金髮長腿模特兒，仲會不停換畫。最近里安納度又被爆新歡係23歲嘅德國模特兒Lorena Rae，但同時又被指同高學歷模特兒Elizabeth Turner行得好埋，究竟里安納度會揀邊個呢？

Lorena Rae上月初同里安納度傳緋聞，二人被拍到共進午餐，又踩單車兜風，同里安納度以往溝女嘅招式一模一樣。另一邊廂，剛過去嘅周末里安納度被影到於洛杉磯開party，Elizabeth Turner亦在其中，因而傳出同時與兩辣模拍拖。