連續幾隻新股嘅暗盤價都跌穿招股價，一上市即潛水就更加唔使講，好多招緊股嘅新股，之前話會認購嘅機構投資者，聽聞都抽飛。物極必反，尤其投資市場，弱勢一形成，幾好質素嘅股份都要捱。估唔到抽飛、炒唔起嘅「勢頭」會蔓延到渣打150周年紀念鈔。
噚日睇電視，見到不少市民晨早去渣打銀行排隊買紀念鈔，喺電視台鏡頭前，唔少人都不諱言自己買嚟炒。不過據報道，紀念鈔冇市場，仲有唔少之前訂咗貨嘅買家縮沙。
香港人腦筋轉得快，見勢色唔對，寧願嘥咗排隊嘅工夫，即場原價沽貨。
不過喺股市，好多投資者就未必咁當機立斷。就以抽咗新股嘅投資者為例，如果分到一手，但隻股唔升，甚至潛水，好多投資者寧願繼續持有，博有機會反彈，因為一手貨講緊都係幾千蚊本錢，就算壓喺度都唔算係乜嘢，更重要係，抽新股都要輸，感覺唔好嘛！