當年今日
關於我們

【估估下】英超21世紀最「乜嘢」陣容

蘋果日報 2015/09/05 06:00

英超

周不時都會有啲乜乜明星隊、最強陣容出現,呢隊咁嘅英超最「乜嘢」陣容你又見過未呢?望真啲個陣容,唔係個個都無名小卒嚟,淨係同阿仙奴有關係嘅,都有三位球員入選,禾確特、路斯基,仲有已經離隊嘅戴亞比;兵工廠嘅倫敦鄰居熱刺都唔執輸,有伊高圖同京治兩位代表,另外前英格蘭國腳、踢過拜仁慕尼黑同曼聯嘅夏格維斯都榜上有名。

不過,呢隊英超21世紀最「乜嘢」陣容,真係唔入選好過嘞,因為呢隊波全名係英超21世紀「傷得最耐」陣容,全隊波傷得最少時間嘅,係前熱刺左閘伊高圖,不過都有752日;至於最長嘅就係有「文員」之稱嘅戴亞比,佢傷足2,156日,全部11位球員加埋嘅話,就傷咗13,049日!