美國次按風暴吹到環球股市東歪西倒，聯儲局上星期五晚突然減貼現率半厘，支持股市，為心血少嘅投資者打支強心針。不過，有網民反對聯儲局減息，認為一啲人損手係自作自受。
喺《CNBC.COM》討論區，網友NeilH唔知係有遠見定係幸災樂禍，話聯儲局絕對唔應該咁快減息，放款機構同業主落得如此下場係自己攞嚟，就當係交學費，救市只會令其他人有樣學樣。MichaelA就踩多腳話：「呢班人係玩火自焚。」

shanev137亦喺《CBS》討論區反對聯儲局減息，認為咁樣做係公家出錢津貼有錢人。sparks224睇唔過眼，揶揄話：「好彩聯儲局冇幫補打工仔，如果唔係仲唔變成『共產黨』。」
PingP慨嘆話：「點解有啲人咁黑心，成日憎人富貴厭人貧，假如股市大跌搞衰經濟，到時都係一鑊熟。」