劉嘉玲、謝君豪及秦沛，今日去到新蒲崗為舞台劇《奪命證人》進行綵排，同時宣佈將會於7月28至8月18日，由原先公演10場加至15場。

劉嘉玲話現階段緊張壓力大，多於開心，嘉玲話：「對於角色人物未係好熟，自己對白唔多，要有戲仲要係戲中戲，o依家地獄式排練，練功、做gym，狀態好啲、精神啲。」嘉玲指自己飾演一個有問題嘅人，搵咗形體老師教導，希望演出時有少少唔同。」

嘉玲仲話：「拍電影同演話劇唔同，最近行街、食飯、做運動都諗住對白，夜晚瞓覺紮醒攞劇本睇，自己好緊張。」梁朝偉對嘉玲呢次演出舞台劇相當感興趣，嘉玲話：「偉仔都好支持，佢話想嚟睇吓，我話未排練得咁好，佢話就係想睇吓中間嘅情況，我都想佢同君豪一齊演，我亦唔排除喺舞台劇，我同佢一齊做。」

講到偉仔噚日56歲生日， 嘉玲透露，噚日喺屋企食飯，偉仔媽咪、細妹、妹夫同埋啲小朋友一齊嚟，嘉玲送咗一個海底帆船造型嘅蛋糕畀偉仔慶生日， 偉仔都忍唔住讚嘉玲話『你咁都諗到』，嘉玲話：「佢都忍唔住豎起大拇指讚我，平時佢讚我都唔會講。」嘉玲話最近好多人打俾佢，應徵做梁朝偉嘅經理人，嘉玲話：「o依家我幫佢篩選，偉仔休息到9月就會開拍一齣電影。」

另外，謝君豪演出舞台劇雖然有經驗，但佢都話有壓力，君豪說：「所以會迫自己早啲瞓，多啲做運動，今次同Paul哥合作學到好多嘢。」秦沛就話：「多謝佢哋扮緊張，令我個人舒服啲，我排咗兩、三個禮拜，你o依家冇咁緊張，但係未正式公演，未知會唔會愛上演舞台劇。」

精選娛聞，喺晒《娛果》
http://fb.com/appledailyent