噚晚出席食店開幕嘅筱靖，之前同朋友合資開嘅德國餐廳，因為同拍檔出問題，欠下大筆債務，大約有七位數字，仲要搞到好麻煩，佢話：「已經處理咗好多，舊股東嗰啲已經清咗盤，生意會繼續run，自己會建立一個新嘅品牌，投資咗七位數字入去，0依家裝修緊。呢個禮拜會有個飲食展，下個月從新出發，會再諗啲新嘅菜式。」

筱靖仲話之前有好多債務，帳目又好混亂，牽涉都有七位數字，0依家用法律途徑去處理。雖然遇到阻滯，不過佢對做生意嘅決心依然好強大：「比演藝事業更加有挑戰性，而且呢個品牌係我一手建立，唔會咁易放棄。」蝕咗七位數，再拎多七位數做生意，睇唔出佢都係富中小富婆，筱靖笑話：「我都係努力工作啫，舊品牌我一手一腳帶出嚟，冇必要放棄。」

另外，陳嘉桓啱啱幫大台拍完《Amazing Summer》，上一季係葉翠翠拍住吳若希做，佢哋做完之後都大肚，佢笑話：「所以監製話我同雨僑都好大機會，雨僑有男友有着落啦，但我未有。」如果遇到啱嘅會唔會閃婚？嘉桓話：「邊有咁快呀，人都未有，不過閃婚都幾浪漫，我都接受到，但唔心急，仲可以等多一兩年，我都有兩年冇拍拖，就快兩歲嘅細佬係我嘅小男友，o依家再搵男友會視為結婚對象，條件好簡單，只要接受到我做呢行，不過其實都好難，首先認識我先講。」