國內講土地增值稅講咗好耐,其實政策一早訂咗,只係欠咗啲細節,昨日突然有細節出台,國內地產股自然跌到一仆一碌,A股B股啲氣氛梗係唔得,照理港股氣氛都會差啲,但班好友都有兩度板斧,仲可以推高恒指36點。
港股昨日嘅波幅雖然窄,但好淡大戶埋身肉搏嘅場面就多咗,成交增加80億元,過埋下個禮拜期指就結算,恒指仲企喺上個月結算價差唔多水平,好淡都冇乜優勢,好友同淡友係時候搶番個有利陣地。
𠵱家仲未知開大定開細,不過,昨晚美國會公布PPI,美股應該會有炒作,近日花旗嗰邊唱緊聯儲局唔會咁快減息,但係就冇當壞消息炒,分析員話通脹繼續跌,經濟增長又好似冇想像中咁差喎,實情係咪咁就唔知,不過,有啲迹象搭定個台做場好戲,大企業就快公布業績,分析員睇得幾樂觀,聽到呢啲戲前對白,好友會放心好多。