韓國女團Red Velvet嘅26歲隊長Irene，前日與32歲Rapper San E擔任《KBS特輯-韓國越南建交25周年友情Super Show》嘅主持人，期間有粉絲拍到San E突然將手放喺Irene膊頭嘅片段，San E無禮嘅行動立即引起粉絲炮轟，要求佢向Irene道歉。

據粉絲拍攝嘅短片可見，Irene與San E於播出VCR時坐低休息，Irene正低頭專注睇台詞，只係不時抬頭向粉絲揮手打招呼。點知San E就突然將手踭搭喺Irene膊頭上，並向台下粉絲伸脷，而Irene就畀San E嘅舉動嚇咗一跳，顯得十分唔自在，笑容亦相當尷尬。

粉絲將短片放到網上聲討San E嘅行為，隨即引起瘋傳及討論，有唔少粉絲及網民炮轟San E嘅行為失禮、唔尊重Irene，又指San E嘅舉動有嘲笑粉絲嘅意思，要求佢向Irene道歉，但亦有粉絲力撐San E只係開玩笑，引起雙方罵戰。