講咗幾個月，香港迪士尼樂園全亞洲獨家嘅「星球大戰：入侵明日世界」6月11號有得玩嘞！話說八方噚日聽到有記招，山長水遠都去樂園幫大家八卦，點知「明日世界」都係圍晒板，成班行家齊齊睇片聽預告，仲要連條片都唔cap得呀陰公！

但一場嚟到，都講啲新嘢畀大家知啦。嚟緊「飛越太空山」會變成「星戰極速穿梭」，遊客可坐住X-Wing戰機去札古沙漠執行任務。排隊位亦變身反抗軍機庫，停泊1︰1嘅X-Wing及機師制服，仲係全球首次以相同設置展出。反抗軍秘密基地「星球大戰：指揮站」亦搬到香港，Chewbacca同R2D2將會現身。小朋友可參加為香港而加料嘅「絕地聖殿武士特訓」，學吓點用光劍迎戰Dark Vader，絕地武士仲會首度用廣東話、英文及普通話教路。
嫌未夠喉，遲吓樂園仲會提供星戰造型食品，仲可以喺樂園酒店加6嚿水住星戰房，加多688蚊仲有得玩cosplay同親手整把屬於自己光劍。