「草泥馬」等網絡十大神獸紅極一時，但始終都係內地網民嘅作品，講起上嚟點都未夠親切。高登網民近日製作一系列港產網絡神獸，為本土網絡文化寫下歷史一頁。所謂網絡神獸，其實係網民惡搞出嚟嘅虛擬生物，用嚟諷刺、影射吓某啲真實事物，等大家會心微笑。請唔好介意，唔少神獸嘅名字都係粗口諧音，但睇落又真係令人笑餐飽。

八方今次為大家介紹其中幾款「較斯文」嘅港產神獸，首推「金翅仆街鳥」，望文生義，唔使多解釋大家都明講緊乜。另一新晉神獸係小學雞，據講佢只有7毫米高，經常撩事鬥非，欺善怕惡因而得名。至於近期大熱嘅神獸叫五毛蟷，網民話佢原產地係強國，近來喺香港迅速繁殖，喜歡到網絡灌水，提及「特駒正虎」（特區政府）同「共橙蟷」（共產黨）時情緒尤其激動。