當年今日
關於我們

【網民hot talk】畀腳大油夾硬過 飄移的士「OK喎」

蘋果日報 2018/03/22 00:01

快綫網民hot talk的士青葵公路飄移

香港有個都市傳說,傳聞各條快速公路嘅慢綫同中綫,係有鬼嘅,以致俗稱「快綫」嗰條最右行車綫,成為各路駕駛英雄必爭之地,無論車速快慢,都硬係鍾意長期佔用快綫。日前喺網上就出現咗一段「快綫爭奪戰實錄」短片,由路過嘅片主前後車cam拍低整個精彩過程,最後結果係點?打和啩。
片段左下角顯示,拍攝日期係星期一(19日)下午大約3點鐘,當日天氣麻麻有微雨,地點相信係青葵公路機場方向,準備進入長青隧道前嘅橋面路段。雖然行緊中綫嘅片主,車身原裝尾翼略略遮擋視線,但不難發現斜後方嘅快綫有部黑色私家車,同中綫片主車速相若行駛中。
忽然黑色車後方有架紅色市區的士快速抽頭切入中綫加速,黑色車即刻疑似「篤油」封位,防止的士爬自己頭。勢估唔到,的士大哥似乎已經豁出去,全力加速下成功喺片主同黑色車之間空隙,重新切入快綫,不過懷疑因為車速太快、動作太大、條公路太濕滑同埋司機太粗心大意,終於跣胎了。
未完!片主前方車cam就影到,的士一度嘗試反手軚修正,可惜變咗拓海絕技「慣性飄移」,車尾由右邊大力「揈」番去左邊,司機再反軚可惜已無法力挽狂瀾,車身順住衝力轉足360度,可惜最後因第三次回軚唔夠快,的士左邊車頭細細力「錫」咗路邊石壆一啖,未有嚴重損毀,相信司機亦都冇乜受傷,起碼片尾仍然見到司機哥哥雙手有動作,作為花生友嘅片主亦忍唔住讚嘆咗句「OK喎」。不過,唔知的士車上有冇乘客呢?今次飄移又算唔算優質呢?
起初唔少網民都驚嘆的士大哥嘅技術,一個路邊雪糕筒都冇掃低,又馬後炮式恥笑司機技術未到家,差少少先可以全身而退。不過亦有人為的士平反,話一日最衰都係黑色「快綫L」,唔係爬頭就唔好頂住條路。
嫌長氣都要奉勸各位駕駛者一句,根據《道路交通(快速公路)規例》,快速公路上必須靠左綫行駛;超車呢,亦只可以喺右邊越過。犯呢兩件事,交通警都可以截停抄牌罰款450大元。咁即係點?黑色車同的士「打和啦!」只係的士損失慘重些少囉。

【識睇睇留言】
Gary Yau:自己炒埋路肩唔阻人,果然優質
Yiu To Wai:如果最後嗰下唔撞就神級喇
Kenneth Gee:司機唔該長青隧道入口前個龍門架落丫
Marky Kan:用愛膚堅啦!
Andy Yeung:過到就拓海......過唔到咪填海囉
Gordon Yu:坐車送機動遊戲嘅刺激,証明係有術又優質嘅服務
Jerry Hong:s形落坑,一個樽都冇跌,冇分
Leo Lam:個人無事咪好囉,無事先做到世界冠軍㗎嘛
Smart Dum:公路最危險就係見到呢啲紅跑表演,隨時笑到失控
empty