每年書展來臨，香港各路政治人物，梗唔會放過呢個一年一度「掘金」機會趕住出書，但係要喺芸芸政治書中突圍而出，除咗講名人效應、書題要跟貼政治大市走勢外，包裝更加唔少得，好似由行政會議成員、新任消委會主席張炳良揸旗嘅新力量網絡，就出咗本《十年回歸．十年盤點》，論盡十年特區風雲人物。
呢本書最吸引人未必係內容，而係用特區護照個樣做封面，擺喺書展真係唔買都會埋去揭吓。張炳良同八方講，之前已經問過法律意見，認為咁樣做冇問題，佢又講明呢本書絕冇篩選，保證唔會篩走民主派嘅人同事，原汁原味論盡香江政壇十年風雲。