賈曉晨(JJ)同雨僑噚晚喺銅鑼灣出席《非常大婚》首映，二人剛巧同另一半喺噚晚旅行完返港，同時聲稱係第一次。

問雨僑係咪同羅力威同房？佢笑言﹕「呢個係好尷尬嘅問題，話係又畀人笑，唔係又畀人笑，我唔中計。」佢話同行仲有另一對男女朋友，問第一次係咪好浪漫？佢話﹕「係第一次去旅行呀，全程食同買嘢。」

咁有冇畀老闆鬧？雨僑話﹕「呢幾日都有問經理人老闆反應，但未見蕭生(蕭定一)，公司唔係唔俾拍拖，但唔想太多是非。」現在同羅力威關係係咪更進一步？佢話﹕「都係好朋友，可以一齊去旅行嘅朋友。」佢對朋友嘅定義真係好廣泛！