吳雨今日見傳媒否認被降職，又澄清本身係高級顧問，只係開台時，自行要求要一個行政職銜，佢又指亞視管理層之前係協盛協豐（0707），o依家係亞視控股有限公司，問到有亞視員工爆料稱TVB過檔嘅員工同亞視舊人磨合唔到，吳雨堅稱：「唔會，都係我悉心去組織，樂視、nowTV同Cable，五台集中，百花齊放，其實做嘢都好開心，點會有呢啲發生呢，問我呢，未算做到最好。」

問到做完「開荒牛」目前功成身退，吳雨笑言：「仲要繼續，牛仲要耕田，真係好無辜耕緊田被人插一刀(有呢個傳聞)。」咁製作總監林嘉穎舊年以私人理由遞信辭職一事，吳雨解釋：「林嘉穎係因為身體問題，12月已經話唔做，但我一直叫佢幫手，所以做到5月7號就last day，我哋有一連串嘅部署，何麗全亦係顧問，佢可以幫我哋睇住。」

講到亞視「泵水」係唔係冇問題，吳雨斬釘截鐵咁話冇問題：「如果有問題咁點做呀。」區偉林並冇咩補充，正如吳雨咁講，區偉林話：「馬六甲投資成百億係一個誤會要快啲澄清，此外嚟緊5月29號有一個印象城嘅投資項目，係一個退休天堂，老闆仲叫吳雨帶啲記者去參觀，亦都會邀請亞視藝人去做opening，又會拍旅遊特輯推廣，好多嘢做緊，馬來西亞都有一個OTT平台，同國內有合作拍劇、做音樂節目，未來都會一直耕田做顧問，俾一啲專業知識，團隊就幫手執行。」

問及出糧方面，吳雨指自己入職時已經同老闆講出糧一定要準，同財務部講過要每月28號全公司啲同事都要出到糧，吳雨解釋：「之前亞視都出現過呢個情況，譬如28號係公眾假期，就要提早一日出糧，堅守呢個原則，由籌備到o依家都冇拖過糧。」

相關報道：
吳雨區偉林急開記招 否認降職：老闆心目中有打算
https://bit.ly/2JMVlwC

CEO吳雨變顧問 藝員唔知咩事 樂瞳：按本子辦事
https://bit.ly/2rhAVoF

原本職位係顧問 吳雨：只係開台自行要求有行政職銜
https://bit.ly/2w8HPlc