楊生呢輪面對傳媒壓力,依然一臉淡定,咁佢出名孝順兼且一家人齊心,除咗楊太君出嚟支持,楊太陸小曼、大女楊諾思、二女楊玳詩、大仔楊其龍都齊齊撐場,重現上年4月英皇證券(717)上市嘅盛況。
查實已屆高齡嘅楊老太好活躍,不時以行動支持乖仔,好似今年初容祖兒嘅演唱會首場、上年11月英皇鐘錶珠寶搞嘅珠寶首飾預展、英皇陸運會、65周年紀念晚宴等,楊老太都氣定神閒咁出席,而且仲表現投入,絕對係母慈子孝。
由於係鼠年首隻上市嘅新股,又適逢新春佳節,新傳媒送畀港交所(388)嘅紀念品亦好有意頭,係由5個利是封組成嘅掛畫,利是封面印住新傳媒5份雜誌嘅圖案,都幾有心思。
另外,由於全球華人關注嘅淫照風波餘波未了,噚日繼續吸引大批娛樂同港聞記者到場追訪楊受成,港交所亦採取特別措施,檢查記者工作證,只准財經版記者入場。