當年今日
關於我們

薪高位危 - 左丁山

蘋果日報 2009/07/05 00:00


聽到《南華早報》總編輯劉志權與資深編輯楊健興辭職或提早退休嘅消息,有啲傷感,傳媒呢行認真難做,有外國記者批評香港報壇多娃娃面,前線採訪人員甚為年輕,經驗不足,在重要記者招待會浪費發問時間。但係,做得耐嘅記者編輯又會俾人話積累福利太好,不符經濟效益,務要除之而後快,總之係慘。
CK與Chris都係浸會書院畢業生,本地薑而在《南早》做到有資格成為數一數二嘅健筆,非常難得。早兩三個星期前,碰到CK,仲聽見佢講《南早》要cut皮,辦公地點會由糖廠街搬去天樂里京寶大廈以前TVEI(電視企業)嘅舊址,地方細好多,會唔夠地方用,一啲同事要搬入大埔廠房,言猶在耳,就有兩個人騰出空位嘞,CK與Chris吖嘛。七月一日授勳名單之中,劉志權獲委任為JP(太平紳士),唔知算唔算係佢嘅一份「拜拜禮物」呢!現在時興講風水,風水師大行其道,每日見報,一啲識得風水嘅人士向左丁山吹水:「TVEI以前在禮頓道一號辦公,旗下企業家去咗邊呀,例如見聞會社、博益……。」左丁山叫佢咪講落去。
《明報》「李先知」(七月三日)講:「知情者續稱,楊健興的離開已醞釀了好一段時間,因為他屬於福利極佳的舊制員工,對於講求經濟效益的《南早》大股東郭鶴年家族而言,這名在《南早》工作了25年的資深政治編輯明顯是屬於貴的一類。有說楊氏離任時可以領取的退休金是以百萬元計的。踏入2009年以來,隨着香港經濟大幅下滑,《南早》已先後裁員兩次,並且集體減了一次人工。因此,消息指當事人早有心理準備,問題遲早都要解決。」
睇完係唔係有啲心淡呢?一位資深僱員自大學畢業就加入報館,一做二十五年,表現極佳,為報館廣結人緣、網絡,得過美國方面贊助到著名嘅BrookingsInstitution做研究,橫講掂講都係一名本地卓越記者與編輯,正當盛年,就要離開,而離開嘅理由就係「屬於福利極佳的舊制員工」,死未?恐怕「李先知」寫完,佢或者都會有「他朝君體也相同」之嘆!早知十零年前就轉工考入政府做新聞官好過,以Chris嘅資歷,家起碼係首席新聞官嘅上司啦,起碼唔會裁員先。