童星出身、李家鼎與前妻施明所生的35歲大孖李泳漢，昨日大個仔娶老婆，跟拍拖兩年圈外女友嚴佩鈺（Conny）奉子成婚，雙喜臨門。泳漢先於上午穿上中國傳統結婚禮服接新娘，其間泳漢跪地跟老婆咀嘴，之後乘花車時又如接吻魚般錫錫，愛得相當癡纏。
李泳漢和Conny昨晚在沙田馬會會所擺喜酒，筵開二十席。泳漢與太太接受傳媒訪問時互給對方一百分，繼而又再甜蜜咀嘴。泳漢指籌備婚禮時間不夠一個月，以致百般甩漏。問太太是否有身孕？泳漢開心承認說：「係呀，𠵱家三個半月，係一個surprise，未知男定女，不過自己作為父親直覺，呢個係仔。」問鼎爺是否最開心？泳漢反指是細佬李泳豪：「最開心係豪仔，佢當日知道之後由朝早笑到凌晨，仲講明我個仔出世之後，佢負責車佢返學做司機。」泳漢指太太有身孕而未能前往度蜜月，問可有給太太愛的承諾時，泳漢說：「今朝先讀完一份賣身契，裏面好多條三從四德，讀到我都驚呀！」

泳豪呻冇時間拍拖

昨日泳豪與蓋世寶分別擔任伴郎伴娘，記者指他日輪到泳豪結婚豈非更開心時，泳豪說：「我都未拍拖，唔知㗎喎！自己其實冇時間拍拖，排滿晒工作。」可渴望早日成家立室？泳豪說：「唔係想就得，緣份嘅嘢冇得強求，屋企人冇畀壓力我。」至於鼎爺昨在電話中被問到榮升老爺心情時，他表現興奮說：「多謝多謝！Happy Happy！」昨日呂良偉、徐小鳳、邵音音、鄧梓峰和黃芷晴等前往飲喜酒，阿呂並傳授泳漢心得說：「老婆永遠是對的，咁就冇交嗌啦！」
採訪：譚倩宜
攝影：陳俊強