民政事務局常秘林鄭月娥就嚟升做發展局局長；佢老闆肥平斯人獨憔悴，過多幾日就加入失業大軍。林太好唔捨得民政事務局，但肯定唔會掛住肥平。八方噚日問林太，會唔會掛住肥平，林太即刻話，又唔係話冇機會見，遲啲都會再見啦。至於肥平離開政府可唔可惜呀？林太就唔肯評論喇！那邊廂，霍震霆就似乎掛住肥平，話對舊班子嘅離開好惋惜，仲希望可以早啲同曾德成溝通吓啦。
就嚟做局長嘅林太心情靚爆，噚日仲寸埋民建聯。林太去九龍社團聯會嘅酒會，大讚對方有好多會員，遠多過號稱萬人黨嘅民建聯，民建聯好應該學吓啦！但唔知係咪因為太多會員，個酒會去到最後乜都俾人掃晒，唔夠嘢食，酒會發生呢個情況都好少見。