吳君如首次自導自演嘅電影《妖鈴鈴》，即將喺12月聖誕新年檔期上映，以八十年代港產片最拿手嘅鬼怪殭屍為題，兼以喜劇包裝，搵嚟吳鎮宇同方中信一齊演出呢套輕鬆喜劇。

日前三位演員就喺觀塘接受「蘋果」訪問， 電影安排喺聖誕新年期間上映，三位既為人父母，又要幫電影宣傳，時間上點分配？君如話：「今年聖誕係比較特別，因為平時我一定唔開工陪個女，而且屋企一定要有聖誕樹，我每年都會托一棵返屋企，但今年個女投訴我陪唔到佢，個所以自己買咗個細嘅畀自己。」

而鎮宇同方中信嘅情況跟君如一樣，佳節期間要開工，鎮宇話：「因為我哋如果無電影就無聖誕過㗎啦，不過真係個仔出世後我先開始著重聖誕。」方中信話：「一定要同屋企人一齊，同埋要焗隻火雞，聖誕禮物就俾老婆搞我淨係負責畀錢。」君如問方中信：「咁你使唔使扮聖誕老人俾個女睇？」方中信話：「唔使，但我想搵聖誕女郎多啲，奈何唔得呢。」

作為廿四孝父母，三位又有無試過親自上陣扮聖誕老人氹仔女？鎮宇首先話：「一早就同個仔講呢個世界無聖誕老人，聖誕老人好耐以前已經死咗，因為佢太老啦。」君如就話：「我梗係有，喺佢面前我咩都要扮，啱啱萬聖節個女嚟到片場，見到我哋啲特技化妝嘅喪屍又話要扮啦。」

三位相識多年，但原來會一齊渡佳節嘅並非聖誕，而係農曆新年，君如話：「聖誕我哋唔係咁容易出到街，因為周圍咁多人，所以新年會過去鎮字屋企玩吓魚蝦蟹局，不過呢啲就唔會帶小朋友去。」

如果要你哋三個各自幫仔女設計造型去聖誕Party，大家會點選擇？方中信首先話：「聖誕Party唔理佢㗎喇，車佢過去擺低就算，鍾意扮咩咪扮咩囉。」君如同鎮宇喺隔離就抵死地話：「點會呀？真係劈低佢？起碼同啲Auntie飲兩杯先啦？」方中信話：「佢啲同學仔全部西人嚟，我唔鍾意同西人Auntie飲嘢。」君如再問：「點會呀，你喺班同學阿媽入面都應該幾受歡迎？」方中信先陰陰嘴笑話：「都係嘅。」跟住鎮宇就笑話：「你唔揸住酒杯搖吓搖吓咁，同啲西人Auntie講：『Hello How are you? I am Fine』。」

講番問題，君如話一定會囡囡打扮：「不過要睇吓當時有咩受歡迎就要扮邊樣，我年年都要去石板街同佢買Cosplay衫。」至於鎮宇就透露仔仔試過有一年，想扮Star Wars黑武士：「不過佢肥得滯，件衫拉唔到，笑死我，下年叫佢扮雪人好過。」

講番套電影係君如首次執導，心情如何？壓力大唔大？佢話：「梗係大啦，要招呼鎮宇同方中信兩個大帝真係唔簡單，首先要餵飽血糖低嘅鎮宇，佢食飽咗血糖就會飆升返又可以繼續拍。」

至於方中信，君如再講：「 佢係俊男但我整咗個造型畀佢搞到天怒人怨，因為我覺得喜劇係需要造型，觀眾要睇到反差。佢(方中信)本身好多頭髮但我設計咗個地中海造型，於是每日就要黐頭套，你知男人最忌係頭髮，而且方中信話一條頭髮都不能少，所以拍嘅時候真係日日提心吊膽。」

君如稱從來無擔心兩位嘅演技，只緊張佢哋會唔會天氣熱或食唔飽發脾氣，所以每日都盡快拍晒兩個啲戲份先。 方中信喺隔籬就踢爆話：「點解好似唔係咁嘅，明明係君如話自己住得遠要拍咗自己先，都係講一套做一套。」鎮宇再話：「平時我哋聽到係：『唔使理佢哋拍我先。』。」

咁方中信同鎮宇鍾唔鍾意今次大肚腩加地中海造型？方中信話：「今日上嚟做訪問時經過樓下啲妹妹仔都會話『方中信好靚仔』咁我禮貌咁笑一笑，之後心諗上嚟要宣傳呢套戲有個咁樣嘅造型，咩形像都幻滅晒。」佢續說：「衰在我好鍾意呢個造型，點知個頭套一黐黐咗四十幾日，每日十二粒鐘，真係攞命。」

咁拍攝途中有無咩趣事發生？君如表示不論鏡頭前後都有好多，傍邊嘅鎮宇就插嘴話：「一啲都唔好笑，有咩好笑呀？夜麻麻黐住個頭套，坐喺度等幾粒鐘，跟住又拍幾粒鐘到天光，跟住天光又返入廠再拍幾粒鐘。」

講番故事嘅構思，君如話源自一單新聞而起：「就係香港成日都有啲舊樓要收樓重建，但總有幾戶唔肯搬走，於是畀人Cut水Cut電，又或者有啲都市傳說講啲舊樓有鬼 ，有單新聞就係有個社工同記者入去一間盛傳有鬼嘅舊樓探險，結果發現其實係有露宿者喺入邊，但嗰位露宿者好瘦所以被誤會係鬼，完全係一個悲劇，但亦因為咁而開始構思故事，我一直都想拍一套驚嚇喜劇，今次終於還了心願。」

採訪：曹家誠
攝錄：馮峰　NEO
剪接：Sami
攝影：沈健程
方中信服裝提供：DIESEL