韓國26歲「馬舞女」泫雅去年孖同門師弟團PENTAGON嘅Hui及E’Dawn組成「Triple H」，近日「Triple H」攜專輯回歸，並頻頻上各大音樂節目宣傳，前日韓媒大爆泫雅同24歲嘅E’Dawn發展姊弟戀，事務所指向二人求證後極速否認戀情。點知噚日泫雅卻公開認戀，更認秘戀兩年，搞到事務所變成講大話，二人噚日喺KBS節目《Music Bank》亦公然放閃，sweet爆全場(相關新聞連結： https://bit.ly/2vgUjEi )。

不過公開戀情後，似乎對事業有所影響，加上瞞住事務所拍拖，所以嚟緊「Triple H」嘅活動都相繼被取消，當中包括原定於在今晚舉行嘅簽名會，以及上MBC《SHOW音樂中心》同SBS《人氣歌謠》都被取消。

粉絲簽名會嘅主辦單位就喺官方網頁宣佈接獲事務所通知要取消簽名會。至於電視台節目錄影取消，似乎係因為噚日《Music Bank》嘅焦點都落喺泫雅同E’Dawn身上，噚日嘅舞台視頻嘅點擊喺Naver TV仲創下咗60萬嘅點播量紀錄，超過第二名10倍。

而網民就有唔少陰謀論提出，覺得因為泫雅隱瞞公司拍拖，令到事務所嬲嬲豬而雪佢哋，又有網民認為偶像公開戀情就要承擔賠上事業嘅後果。

精選韓流，喺晒《娛果》
http://fb.com/appledailyent