收起事業線，周秀娜 (Chrissie) 在影壇尋找新定位，今年終憑《29+1》征服觀眾，讓人認識演技派一面，最新勇於挑戰cult片小三、60年代電影吸毒窮人角色。

在新cult片《女士復仇》，Chrissie飾演10年來誤以為自己是正印的小三，知道真相後誓要找出正印鄧麗欣，誰知還有第四者樂基兒。稱為cult片，皆因三女追逐互鬥是開鎗、打打殺殺，「有好多動作場面，好血腥。喺龍華酒店拍，有幕喺天台，好似發哥拍《縱橫四海》咁雙手揸鎗嘅場面。」角色精通電腦科技，能極速偵測正印目標，她勁呼好玩，「好少可以咁癲，角色好粗魯火爆，講晒粗口、食煙。」

曾拍拖就會知道發現自己是第三者的感受，因此Chrissie沒有特別去揣摩角色，開拍前只著重學揸鎗姿勢、眼神，「贊同角色想知點解男友一開始就呃我，冇咗信任，唔需要再喺埋一齊。」換轉是她遇上同一遭遇，她會選擇放手，不會尋根究底誰是男方的最愛，「如果佢真係鍾意你，唔需要咁逼住佢，你再逼，搵到第一、第二個，甚至第三個女人，佢之後或者依然係會咁。」

另一套電影對於身心挑戰更大，是Chrissie首次接拍吸毒題材，故事圍繞60年代吸食鴉片，「上網睇好多資料，如果有錢去食，鴉片對外形唔會有太大影響，但如果收入係普通，嗰個年代維持生活已經好難，仲要去食鴉片更難，唔夠錢去食就會處於頂癮狀態，我就係呢種，唔係去到口水鼻涕流晒出嚟、食得好深嘅狀態，但有呢個癮，又冇錢，爭人周身債，係戒緊嘅過程。」由年代背景、甚麼是鴉片、吸毒原因，以至吸食的形態眼神，她都有做功課，甚至從外在著手，「有去清減自己，令自己唔好咁精神、咁飽滿，咁啱開拍煙館戲時，佢哋話我瘦到唔好再瘦。」付出不少，希望她再有新突破。