「超人」李嘉誠私人投資旗艦維港投資（Horizons Ventures）近年投資植物肉、固碳泥土等，多少係希望為全球生態出一分力，但原來呢個初衷，原來係有段爺爺保護孫女的故事喺背後。

話說喺十幾年前，李嘉誠其中一位孫女仲係一個細路女時，有次到高爾夫球場睇爺爺打波，呢個時候忽然間有一輛貨車經過，喺孫女跟前排放出一大團黑煙，呢個畫面對佢而言相當震撼。

就係咁，李嘉誠下定決心要對全球生態做返啲嘢，否則就對唔住下一代，所以近幾年維港投資費煞思量，尋找為世界帶來改變嘅方案，其中一個係投資澳洲一間初創公司Soil Carbon Co.，而佢嘅微生物技術嚟自於另一間誠哥有份投嘅研究機構SoilCQuest。

Soil Carbon Co.係嚟自一群決心拯救泥土碳失衡嘅農夫，透過微生物科技，將大氣中嘅二氧化碳轉化為泥土中嘅「固碳」，泥土亦更加肥沃，一箭雙鵰。

而呢間公司嘅種子輪融資，就係由維港投資領投，共籌得680萬美元，其他投資者包括Grok Ventures、Atlassian創辦人Mike Cannon-Brookes及其太太Annie嘅投資基金，另有澳洲政府的潔淨能源金融公司及Chris Sacca的小寫資本（Lowercase Capital）亦有份參與。

Soil Carbon Co.將兩團泥土送畀李嘉誠，一團係普通泥，一團係已經固碳嘅泥土，顏色會深啲，聽講李嘉誠打開呢份禮物時候，覺得好似睇到地球嘅未來救星，仲會珍而重之地收藏喎。

李華華