「法律超人」謝偉俊Paul爆冷擊敗自由黨董耀中，搶走自由黨盤踞多年嘅旅遊界議席，據聞贏得唔少掌聲。原來阿Paul狙擊富貴黨嘅行動仲未停止，佢話上任後一定要做嘅，就係兌現選舉承諾，解散大花筒旅發局，為市民慳番啲公帑。

旅發局現任主席係田少，阿Paul咁玩法擺明同富貴黨過唔去啫？一向言行相當勇猛嘅阿Paul大大聲聲話：「唔怕得罪自由黨！」亦唔怕得罪任何人，佢話當年以法律超人形象爭取法律界可以賣廣告，都得罪人多，𠵱家仲有乜好怕？
唔好以為阿Paul嘩眾取寵，佢話早前同商務局局長劉吳惠蘭傾偈時，向對方提出呢個建議，佢話劉太覺得呢個大膽建議「幾有創意」，並冇sayno，如果阿Paul唔係吹水，田少旅發局主席職位都可能坐唔穩喎。自由黨喺立法會僅餘六席，人丁單薄，阿Paul覺得今次係「天助我也」，「殺局」建議有齊天時地利人和，伸張正義指日可待咁話。