中環交易大堂屹立32年，下月底完成歷史任務，出市代表（紅衫仔）亦要光榮退役。金融服務界立法會議員張華峰上周五專誠喺中環馬車會舉行「紅衫仔之夜」，廣邀近百位遠東交易所成員出席，唔少人大嘆「好可惜」﹗
遠東交易所、香港證券交易所、金銀證券交易所同九龍證券交易所1986年「四會合併」後，搬入中環交易廣場，交易大堂使用至今。

擁7個牌7件戰衣

張華峰喺金魚缸打滾幾十年，對交易大堂停用特別感慨，佢發起呢次活動，自己着上「2800」紅衫仔。佢因有7個牌照，共有「2800」至「2806」7件「戰衣」。佢憶述當年點樣喺交易大堂走來走去落盤時，津津樂道，話當年場面真係好似大台劇《大時代》咁㗎。
幾件戰衣陪佢30年，佢話可能要交番畀交易所，事關「佢哋（交易所）驚有人拎嚟冒認做犯法嘢」。有趣嘅係，張華峰當幾件戰衣係寶，呢晚其實只得20位仁兄啱dress code，有披上「紅衫戰衣」，有人細細聲同華華講，唔記得將件衫放咗去邊喇。
點都好喇，最緊要大家可以眾首一堂。張華峰希望，港交所（388）行政總裁李小加度個期，喺交易大堂完成歷史任務前，同一班出市代表舉行farewell派對，「想佢（李小加）同一班出市代表出嚟，飲杯嘢，表揚吓我哋」。小加快啲諗諗佢，為交易大堂畫上完美句號喇。

李華華
mailto:[email protected]